Eŭroponto	Interregiona retejo

---

Interlingvistikaj Studoj en Poznań

        La Universitato de Adam Mickiewicz (UAM, la dua plej granda universitato en Pollando) anoncas 3-jaran eksteran postdiploman studadon pri interlingvistiko. La unua studjaro startis en la vintra semestro de la studjaro 1998/99. La unuaj gestudentoj finis siajn studojn en septembro 2002. Ĉiun duan jaron eblas komenci la studojn5.
La internacia kursaro okazas en la Lingvistika Instituto, sub la gvido de d-rino Ilona Koutny, membro de la Akademio de Esperanto. Inter la prelegantoj estas konataj esperantologoj, kiel profesoroj Michel Duc Goninaz, Geraldo Mattos, Humphrey Tonkin kaj John Wells, d-roj Vera Barandovska-Frank, Detlev Blanke, Zbigniew Galor kaj Katalin Kováts, same Lidia Ligęza, Tomasz Chmielik, István Ertl kaj Aleksander Korĵenkov.
La Interlingvistikaj Studoj konsistas el enkonduko al ĝenerala kaj aplikata lingvistiko, el internacia kaj interkultura komunikado, ili traktas planlingvojn kaj detale okupiĝas pri gramatiko, literaturo, kulturo kaj historio de esperanto. En la tria jaro eblas specialiĝi pri lingvistiko, literaturo, interlingvistiko, komunikado aŭ pri metodiko. Pro la metodika formado la Studoj ricevos specialan rolon en la instruista trejnado dum la nuna periodo.
Sesioj (surlokaj kursoj kaj ekzamenoj) okazos unufoje dum la semestro (fine de septembro kaj komence de februaro). Intertempe la gestudentoj laboras hejme kaj povas konsultiĝi kun la prelegantoj rete. La gestudentoj pretigos diplomlaboraĵon kaj post la fina ekzameno ricevos atestilon pri Interlingvistikaj Studoj.

Partoprenontoj povas aliĝi el la tuta mondo. Pli frua anonco estas bonvena.
Postulo: fino de mezgrada lernejo (kun abiturienta ekzameno aŭ egalvalora) kaj bona scio de esperanto. Partoprenontoj devas plenumi orientigan teston antaŭ la komenco de la Studoj.
Kotizo por unu semestro: 400 EUR (por landoj kun pagproblemoj ĉ. 120 EUR, Pollando: 500 PLN).
Por pluaj informoj kaj aliĝilo kontaktu d-rinon I. Koutny:
Lingvistika Instituto de UAM
ul. Międzychodzka 3-5.
PL-60-371 Poznań
T: +48-61 829-27-09
F: +48-61 829-27-00 (sekretariejo)
E-poŝto:

Riĉa kaj sukcesa interlingvistika sesio en UAM (01-09.02.2008)

La nuna interlingvistika grupo ĉeestis sian 6an kaj lastan sesion en la Universitato Adam Mickiewicz en Poznań (PL). La persistaj 18 gestudentoj (el 10 landoj) partoprenis entuziasme la prelegojn kaj praktikan laboron en tri specialiĝoj: komunikado, lingvistiko kaj metodiko.

Okazis kurso pri interkultura komunikado far prof. Humphrey Tonkin (lingvo kaj socio), Michael Farris (signolingvo kaj parolata lingvo); pri radia komunikado far Barbara Pietrzak (longjara gvidantino de la esperantaj elsendoj de Radio Polonia, nun ĝenerala sekretario de UEA); pri sociologiaj aspektoj de komunikado far d-ro Zbigniew Galor, pri vortospecoj kaj denaskismo far d-ro Balázs Wacha (Blazio Vaha).

La instruista trejnado estas sur bona vojo
La metodikan specialiĝon reĝisoris energie d-ino Katalin Kováts, tiel la ekzamenoj iĝis metiejaj diskutoj de veraj instruistoj. Kurson pri metodiko gvidis Maria Majerczak, metodikistino el la Jagiellona Universitato (Krakovo) kaj kontribuis Zsófia Kóródy kaj Ilona Koutny. La partoprenantoj havis eblecon testi sin mem kaj samtempe la unuan C1-nivelan teston (el la novtipa lingvoekzameno, kiun ILEI ellaboras kun la budapeŝta lingvoinstituto ITK por akreditigo).

La Interlingvistikaj Studoj de UAM kaj ILEI decidis kunlabori en la formado de esperanto-instruistoj, kiu delonge atendis solvon. La kontrakton inter la du institucioj nun subskribis la gvidanto de la Studoj, d-ino Ilona Koutny kaj la dekano de la Novfilologia Fakultato de UAM, prof. Józef Darski, vicdekano prof. Jacek Witkoś, aliflanke Zsófia Kóródy, vicprezidanto de ILEI.

Enkadre de la komuna programo kaj formado estis ebleco jam en septembro aliĝi al la metodika specialiĝo de la Studoj, kiu realiĝas en la studjaro 2007/08. La ses aliĝintoj (el 5 landoj) krom la komunaj metodikaj kursoj kaj ekzamenoj povis partopreni lingvan perfektigon, minikursojn pri literaturo kaj gramatiko.

Malferma prelego en la Lingvistika Instituto
La nunan sesion stampis la intensa kontribuo de Humphrey Tonkin. Li prelegis ankaǔ pri la nuntempaj problemoj de e-movado por la tuta grupo kaj eksteraj interesiĝantoj. El liaj prelegoj antaux 3 jaroj naskiĝis lia libro Lingvo kaj popolo (2006). La nova kurso estis denove instiga.

Por kolegoj kaj gestudentoj de la Lingvistika Instituto de UAM, kiuj grandnombre aperis malgraǔ la intersemestra ferio, li prelegis angle pri Ekskludo kaj inkludo en Eǔropo: serĉado de eǔropa lingvopolitiko kun granda sukceso. Ankaǔ lia interparolo kun vicrektoro prof. Marek Kręglewski (kiu malfermis la publikan lingvopolitikan konferencon de la Studoj en septembro 2006) estis fruktodona.

Kiel tradicie, dum la semajno okazis la komuna vespero de gestudentoj kaj geprelegantoj kun partopreno de alvenintaj poznaniaj esperantistoj. Krom la bonetosa vespermanĝo okazis libera kultura programo. Ekskurso al la bela kastelo kaj parko de Kórnik apud Poznan kompletigis la kulturan programon. Fine estis ebleco renkonti la kunlaborantojn de E@I alvenintajn laǔ la invito de Petro Balaz, partoprenanto de la Studoj.

Per tiu ĉi jaro la Interlingvistikaj Studoj atingis 10-jarojn da ekzistado, pro tio septembre okazos festa interlingvistika simpozio, kaj novaj aliĝantoj estas atendataj (informoj: interlin@amu.edu.pl) .

 

Metodika seminario de UAM - ILEI Pola Sekcio

   La Universitato Adam Mickiewicz (Poznan) kaj la Pola ILEI-sekcio anoncas komunan unujaran kurson kun du surlokaj sesioj (lasta semajno de septembro 2004 kaj unua semajno de februaro 2005), dumsemestra reta konsultigxo kaj jarfina ekzameno. La aliĝontoj partoprenos praktike la Lingvopedagogian specialiĝon de la 3-a jaro de la Interlingvistikaj Studoj, sed akiros atestilon pri instruista kurso de la Pola ILEI-sekcio.
    Lingva testo estas kondiĉo por la partopreno. Por la fina ekzameno necesas pretigi skriban laboraĵon pri elektita praktika temo.
    Instruistoj: d-ino Katalin Kovats (HU/NL), Maria Majerczak (PL), d-ino Ilona Koutny (HU/PL) + invitita eksterlanda gasto.

LINGVOPEDAGOGIO
Bazaj faktoroj de lingvopedagogio: 1a sem - KK
Esperanta metodiko: 1-2a sem - KK, MM
Instruhelpiloj: 2a sem KK+ IK

Aldone dum la 1-a semestro okazos kurso pri nuntempa literaturo de Istvan Ertl (HU/BE), eksredaktoro de revuo Esperanto, dum la 2-a semestro kurso pri nuntempaj problemoj de e-movado de prof. Humphrey Tonkin (USA).
Lingva perfektigo: KK, MM, IK.

    Bv. diskonigi tion inter eventualaj partoprenontoj. Pluaj informoj (ne inter 14.08-04.09) ĉe:

Dr Ilona Koutny, membro de AdE
gvidanto de Interlingvistikaj Studoj
Universitato Adam Mickiewicz
Miedzychodzka 5, PL-60-371 Poznan
T: +48-61 829-27-09, sekretariejo: 829-27-01
F: +48-61 829-27-00 (sekretariejo)
http://main.amu.edu.pl/~interl/index.html

Aktualigo: marto 2008	Bonvolu skribi al Eŭroponto		Kodado: Unikodo UTF-8
Aktualizacja: marzec 2008	Napisz do Europonto		© SEA & Worsten 2004